綠草如茵
各位，
1.
我今日唔能夠取消採訪，唔响香港，無辦法出席好朋友謝家賢既喪禮。
與其話我今日無嚟到，不如話响今日，謝家賢原來應該同我一齊，呼吸住新鮮空氣，响綠草如茵既哥爾夫球場上走來走去，同我並肩影相，而唔應該只得我一個人。
不過，咩叫到應該同唔應該呢？有時，我哋無辦法知，無辦法理解。
最重要係，响我哋既生命裏面，有幸認識到佢。佢既離去，損失既係我哋。
當我同謝家賢今個月初响珠海採訪航空展覽既時候，仲講緊今日應該點影點影，比佢笑我要操 fit 啲 ，跟佢行吓山。
而家，我好希望見到佢响球場呢度笑我，而我好努力咁跟响佢後面。只要能夠見到好朋友精神奕奕，取笑一下我，又有咩所謂呢？
2.
據我所知，謝家賢生前所影既最後一張相，係佢同到吉林採訪團友一齊拍既自拍相。
呢張相特別有意義，好反映到一 啲 嘢。事實上，响佢身邊，有好多好朋友，我只係其中之一。
响公佈謝家賢離去既網頁裏面，有好多留言。
留言嚟自行家，嚟自教友，嚟自一齊响唔同活動中認識既人，甚至有啲曾經只見過謝家賢一兩次面，交流過影相心得。
我上星期採訪粉嶺哥爾夫球比賽，就有一位工作人員走過來同我講，佢記得謝家賢曾經影過奧運馬術。
佢開朗既笑容，易於同人溝通既個性，加上敏捷既行動，敏捷到有時我地笑佢好似患咗過度活躍症咁，但正正就係呢啲特徵，會比人容易記得起。
但更加令人深刻既係，佢好樂於幫人。
响工作上幫助行家同後輩不在話下。佢幫屋企人親自裝修，佢幫攝影記者協會搬運，唔介意裝裝柝柝。佢又應承幫朋友影結婚相。
另外，就算佢自己唔跑，都幫參加毅行者既朋友做支援。
採訪地震，見有記者响災場無地方住，比佢住自己既營幕，仲比埋個睡袋人哋用，寧願自己涯冷。
另外，佢去開解一位失去細佬既少女，又幫一個行動不便既學生檢查隻腳，仲幫佢攞一個免費書包。
另外，又派水比護士上路尋親。
佢唔只係做緊一個攝影記者既工作，佢係响度做人，一個會為人著想既人。
以至到謝家賢離去，佢依然响度幫人，將自己既器官，留比有需要既人。
幫人，對一啲人嚟講可能係麻煩，對謝家賢嚟講，只不過係分內事。
謝家賢細我九歲，但諗嘢好多時都比我成熟。
我不時見到佢同好多人都傾得好投契，又知道佢影相工作以外既活動，都排得滿滿。呢啲，都源自佢既為人處事，細心助人。
當然，世界上無一個人會比其它所有人完全接受，謝家賢積極進取既工作態度，有時可能會冒犯咗其它行家。
但當我知道，其它人縱使之前點樣對佢不滿，當佢地知道謝家賢走咗，大家都感到失落，我已經深信，作為一個人，謝家賢係幾咁成功，幾咁令我哋懷念。
3.
我寫咗一本書，入面提到謝家賢响地震既情況，佢知道後好高興，想知我點寫。
我原本想親手交本書比佢，但失諸交臂，只不過離開印好本書相差一個星期，而佢突然走咗。本書叫「無常事」，真係世事無常。
其實，我寧願多聽其他人，講關於謝家賢既故事，多過我講佢既嘢。每一位視謝家賢為好朋友既人，都有好多佢哋值得回味既情節。
謝家賢同我，雖然信奉唔同宗教，但係有啲嘢相通。
佢既宗教信仰話，我哋唔係無緣無故嚟到呢個世界上既。
我既宗教信仰話，我哋之所以相識，亦唔係無緣無故既。
我地既宗教都話，大家會有重逢既一日，因為我哋來自同一個源頭。
我返到香港，會响謝家賢既靈位前默禱，我知佢會聽得到。
响呢度，我想向幾個人問候。
我要多謝謝家賢既父母，你哋良好既教養，令我哋得到一個心地善良既朋友，希望你哋可以節哀順變。
我希望小玲知道，謝家賢雖然响我面前少講佢既私人感情，但唔等於佢唔珍惜。
我覺得，佢只係希望將最私人既嘢，留翻比自己，同最愛分享。希望妳好好保重。
吳曉東，我理解你既心情，我同你一樣，都曾經痛失過一個好拍檔。你話謝家賢走咗，好似熄咗燈一樣，但佢既光，其實已經留响我哋既心入面。唔好太過悲傷，我知謝家賢唔想我哋咁樣。
4.
呢一刻，我依然深深感覺到，如果謝家賢响我身邊，佢係會點樣工作既。
呢種感覺，好多行家都會有。
而我，一定仲會感覺得到。
謝家賢，當你知道，你已經成為我哋生命既一部份，你可以好好安息。
能夠响呢一生認識到你，係我既榮幸。
好多謝你，謝家賢。
---
（2008.11.27 晚祈禱會上由傅俊偉代念）