攝影長征
《我的攝影長征》
楔子
19XX
出世無耐就成為老豆禦用模特兒（見左上角我一生第一張相），用o既係 Olympus Pen F 半格機。
兒時，外公仁慈，部 120 雙鏡反光機，比我拆到散晒。
稍長，賀爾蒙發作，去旅行唔肯比屋企人影，事後睇相，全家一齊去好似無我份咁。
中學畢業，無所事事，霎見衣柜收埋部錦囊 AE-1 加支 S.S.C. 50mm f1.4 同支 FD 135mm f3.5，即順手牽羊。同學幫我入第一筒菲林，响大廈平台遊樂場偷影女仔。
1981
茶餐廳偷聽到龍友講拜師學藝，想拜埋一份。
得知香港有得讀攝影，錯過咗入日校，讀住夜校入門班先。
响天星碼頭南華早報書店睇水禾田本《HONG KONG》，靈光突現，隨即開竅。
1982順利考入成為香港基督教服務處官塘職業訓練中心一年全日制第 18 屆攝影班 33 位學員之一。老師古少成，潘盛時。同組學友朱國明。古 Sir 名句：「唔好攞我個杯當沖罐！」潘 Sir 名句：「暗室不欺」。朱國明成為 Sir 後o既名句：「一蚧不如一蚧」。
遇中學舊友，係當年攝影學會主席，佢話同時用兩部 Minolta XD-7 影相，方知用同一機種o既好處，從此銘記，遠離玩機心態。
日校唔用英文，同我中學校風格格不入。去咗 Photo Centre 「攝影中心」報讀夜間 General Photography ，講師李德泉 。大眼靚仔 Ray Lee 無名句。
响日校同學面前扮嘢讀 Michael Langford o既 Basic Photography 。
職訓師兄何經棠搞展覽，搵後生看檔。佢話「而家再無懷才不遇呢回事，响行內做三五年就知自己得唔得。」越諗越驚。
1983
啲錢買菲林相紙藥水用清光，午飯响黑房自己蔒，用沖罐當碗。雞翼尖白飯，每餐一蚊。
以期中考第 6，期末考第 4 ，唔捨得地同職訓講 bye bye。
身無長物，人面生疏，响蘇杭街見李奧‧費民，好 nice ，但唔請人；响新都城大廈見鍾文略個仔，都 nice ，但人工唔 nice。顛沛流離之際， 阿 Ray 話我成為 Photo Centre 第一個攞 A 既學生，問我有無趣興幫佢手。（講笑咩，係佢幫咗我呀！）返工後，每次佢唔响 studio 我都唔做嘢，偷睇佢o既攝影藏書。
1984
王化人挾兩部 Nikon F3 加 MD-4 同支 Nikkor 300mm f2.8 從英國回港獻技，我過咗檔，學影時裝，但頂唔順化妝化一朝，影相影半秒既生活，終於......
响 1984 年 9 月 26 日中英雙方代表就香港前途問題在北京草簽了《中英聯合聲明》當日，加入咗無知既我起初以為係鹹報o既晶報，從此正式踏上攝影長征。
正文
（下刪萬語千言）
另見：